Nel añu 1979, y pañando´l testigu del grupu teatru qu'hubiere en Carbayín munchos años atrás, créase l´actual Grupu de Teatru Carbayín, iniciativa tomada daquella pol Centru Cultural "Nuesa Señora de Cuadonga", a la que respondieron tanto antiguos componentes del grupu anterior, como nuevos componentes que se sumaron a esti proyeutu. Nun principiu contó con una ocena aproximada d´actores y actrices, que punxeron n´escena como estrenu d´esta nueva andadura la zarzuela asturiana "LA SOSIEGA". Nos años siguientes fueron incorporándose nuevos actores y actrices fasta cuntar con un elencu de más de 25 persones, ente los que yá había una persona encargada de la decoración, una direutora, etc. El Centru "Nsa Sra de Cuadonga" tamién ayudó construyendo´l so actual salón d´actos con un escenariu y camerinos muncho más curiosos pa la representación de les obres. Col tiempu, creóse un grupu de neños, que representaben curtios enantes y dempués de les obres que representaben los mayores, y estos mozos son los que pañaron de nuevu´l testigu hacia l´añu 1993 y los que componen el grupu anguaño.
Nestos momentos, el grupu Tien unos doce componentes d´edaes comprendíes ente los 18 y los 46 años, anque siempre cunten cola collaboración de dellos de los componentes antiguos pa temes d´ambientación, puesta n´escena, etc. Tolos años estrenen una obra de teatru na seronda.
Anque´l grupu de teatru defínese como grupu de teatru asturianu, en dalguna ocasión representóse teatru en castellán, pero nos caberos años solo se representa teatru n´asturianu y ambientáu n´Asturies.
El grupu de teatru representó obres de los principales autores asturianos en bable, tanto de corte cómicu como de corte dramáticu. Ente los más destacaos figuren Pachín de Melás, Pin de Pría, Eladio Verde, Caravera, y un largo etc. Nos caberos años, adaptáronse delles obres al bable, y les caberes obres representaes escribiéronse espresamente pa ser puestes n´escena y estrenaes por esti cuadru de teatru pol so direutor, José Ramón Oliva Alonso.
El grupu de teatru encabeza la nueva corriente de anovación del teatru costumista asturianu, con una novedosa puesta n´escena, cuidada ambientación, decoraos y vestuariu, y testos renovaos y modernos, pero ensin abandonar el cálter costumista d´esta formación, atrapando d'esta forma a los espeutadores más mozos n´esti teatru tan de nueso.
Premios recibíos: Meyor autor: Premiu Aurora Sánchez, en Candás, a José Ramón Oliva en 2005 y en 2008 por la trayeutoria. Premiu Vital Aza en 2005 a José Ramón Oliva por ´'Tan repetíos!´. Premio Impact5 n´Oviéu en 2006 pola anovación nel teatro costumista. Carbayón de plata en 2007 a José Ramón Oliva a meyor idea orixinal y a meyor testu orixinal n´asturianu. Premiu Feteas en 2010 a meyor testu orixinal n´asturianu nel Festival Ciudá d'Uviéu. Meyor actor: Premiu Aurora Sánchez, en Candás, a Guillermo Suárez, en 2007, por ´La maldición de la pita roxa´. Meyor actriz: Premiu Nuesa Señora de Cuadonga en 2007 a Nati Fernández por ´La maldición de la pita roxa´. Premiu Nuesa Señora de Cuadonga en 2008 al elencu d´actrices de ´Chez Telva´. Premiu Aurora Sánchez a Nati Fernández en 2009 por ´Ello yera una vez...´. Meyor direición: Premiu Nuesa Señora de Cuadonga a José Ramón Oliva por ´La maldición de la pita roxa´ en 2007. Meyor obra: Premiu Nuesa Señora de Cuadonga por ´Superpín´en 2006. Nominaos en 2006 a meyor espectáculu amateur nos premios Asturias por ´La difunta y otres yerbes´.
